Posts in category: Blog

காலை ஜெபம்

ஆண்டவரே, உமது உண்மைக்கேற்ப நான் நடக்குமாறு உமது வழியை எனக்குக் கற்பியும், உமது பெயருக்கு அஞ்சுமாறு என் உள்ளத்தை ஒருமுகப்படுத்தும்.

என் தலைவரே! என் கடவுளே! என் முழு இதயத்தோடு உம்மைப் புகழ்வேன்; என்றென்றும் உமது பெயருக்கு மாட்சி அளிப்பேன்.

ஏனெனில், நீர் என்மீது காட்டிய அன்பு பெரிது! ஆழமிகு பாதாளத்தினின்று என்னுயிரை விடுவித்தீர்!

கடவுளே! செருக்குற்றோர் எனக்கெதிராய் எழுந்துள்ளனர்; கொடியோர் கூட்டம் என் உயிரைப் பறிக்கப் பார்க்கின்றது; அவர்களுக்கு உம்மைப்பற்றிய நினைவே இல்லை.

என் தலைவரே! நீரோ இரக்கமிகு இறைவன்; அருள் மிகுந்தவர்; விரைவில் சினமுறாதவர்; பேரன்பும் உண்மையும் பெரிதும் கொண்டவர்.

(திருப்பாடல்கள் 86:11-15)

விண்ணையும், மண்ணையும் படைத்த இறைவனுக்கு எல்லா புகழும், மாட்சியும் என்றென்றும் எப்பொழுதும் – ஆமென்!

இரக்கம் நிறைந்த விண்ணக தந்தையே! இதோ இந்த காலை வேளையிலே, உம்மை போற்றுகின்றோம்! இந்த நேரம் வரை எங்களை பராமரித்து, வழிநடத்தி வந்த உமது அன்பிற்காக, உமக்கு நன்றி கூறுகின்றோம்.

ஆண்டவரே! நீர் என் மீது காட்டிய அன்பு பெரிது! ஆனால், தீயவன் உமது அன்புறவில் இருந்து எங்களை பிரிக்கின்றான், இதிலிருந்து நாங்கள் விடுபட வேண்டும். இறைவா! செருக்குற்றோர் எங்களுக்கு எதிராக எழுந்தாலும், கொடியோர் கூட்டம் என் உயிரை பறிக்க பார்த்தாலும், ஆண்டவரே! என் முழு இதயத்தோடு உம்மை புகழ, உம்மை அன்பு செய்ய எனக்கு ஆற்றல் தாரும். அப்பா! பிறர் எங்களுக்கு தீமை செய்தாலுமே, மன்னிக்கும் நல்ல மனதை எங்களுக்கு தந்தருளும்.

ஆண்டவரே! எங்களை துன்புறுத்திய அனைவருக்காகவும் இந்த நேரத்தில் வேண்டுகிறோம், அவர்களை நாங்கள் மன்னித்து விடுகிறோம் அப்பா! அவர்கள் தங்களது தீய வழிகளை விட்டு விட்டு, உண்மையின் பாதையில் வழிநடக்க அவர்களுக்கு துணை செய்வீராக!

இவ்வாறு உலகெங்கும் உள்ள உமது பிள்ளைகள், ஒற்றுமையுடன் வாழ்ந்து உமக்கு சாட்சியான பிள்ளைகளாக எப்போதுமே வாழும் வரத்தை வேண்டி, இப்போது ஜெபம் செய்கிறோம். ஆண்டவரே! எங்கள் மீது இரங்கும், இரக்கம் வையும், நாங்கள் பலவீனமான மனிதர்கள், எங்களது குறைகளை மன்னியும்.

இயேசு மரியே சூசையே! என் இருதயத்தையும், ஆத்துமத்தையும் உங்களுக்கு ஒப்படைக்கின்றேன். ஆமென்.

பெற்றோருடன் பொன்னான நேரத்தை செலவிடுங்கள்
“பெற்றோர் எப்போதும் நம்முடன் இருக்க மாட்டார்கள். அவர்களுக்குத் தொலைபேசுங்கள், அவர்களைச் சந்திக்கச் செல்லுங்கள், உங்கள் பேரக்குழந்தைகளை அவர்களுடன் பார்க்கச் செல்லுங்கள், அவர்களுடன் சேர்ந்து சிரிக்கவும், கட்டிப்பிடிக்கவும், அவர்கள் மீண்டும் மீண்டும் பழைய கதைகளைச் சொல்லக் கேளுங்கள், அவர்களுக்குப் பிடித்த உணவையும் இனிப்புகளையும் கொண்டு செல்லுங்கள், அவர்களுக்கு மரியாதை, பொறுமை மற்றும் நிறைய அன்புடன் நடத்துங்கள்.”
காலத்தின் நிலையற்ற தன்மை, பெற்றோர்கள் மீது நாம் வைத்திருக்கும் அசைக்க முடியாத அன்பின் மீது ஒரு சோகமான நிழலைப் பரப்புகிறது.
பகிர்ந்து கொள்ளும் ஒவ்வொரு கணமும் ஒரு விலைமதிப்பற்ற ரத்தினம், அது அவர்களின் எல்லையற்ற பக்தியின் ஊற்றைப் பிரதிபலிக்கிறது. ஒரு தொலைபேசி அழைப்பு, ஒரு வருகை, பகிரப்பட்ட கதைகளில் எதிரொலிக்கும் சிரிப்பு போன்ற எளிய செயல்கள், நன்றியுணர்வு மற்றும் தொடர்பின் ஆழமான வெளிப்பாடுகளாக மாறுகின்றன.
இந்த வாய்ப்புகளைப் போற்றுவோம், மீண்டும் மீண்டும் சொல்லப்படும் கதைகளையும் பழக்கமான ஆறுதல்களையும் அரவணைப்போம், ஏனெனில் அவை குடும்பத்தின் செழுமையான பிணைப்பை நெய்யும் நூலிழைகள்.
மரியாதை, பொறுமை மற்றும் அன்பு ஆகியவை வெறும் சைகைகள் அல்ல, மாறாக நாம் பகிர்ந்து கொள்ளும் ஈடு இணையற்ற பிணைப்பைக் கௌரவிப்பதன் சாராம்சம்; அவர்களின் மரபு நினைவில் மட்டுமல்ல, நம் இதயங்களிலும் செயல்களிலும் நிலைத்திருப்பதை உறுதி செய்கிறது.

காலை ஜெபம்

படைகளின் ஆண்டவரே! உமது உறைவிடம் எத்துணை அருமையானது!

என் ஆன்மா ஆண்டவரின் கோவில் முற்றங்களுக்காக ஏங்கித் தவிக்கின்றது; என் உள்ளமும் உடலும் என்றுமுள இறைவனை மகிழ்ச்சியுடன் பாடுகின்றது.

படைகளின் ஆண்டவரே! என் அரசரே! என் கடவுளே! உமது பீடங்களில் அடைக்கலான் குருவிக்கு வீடு கிடைத்துள்ளது; தங்கள் குஞ்சுகளை வைத்திருப்பதற்குச் சிட்டுக் குருவிகளுக்குக் கூடும் கிடைத்துள்ளது.

உமது இல்லத்தில் தங்கியிருப்போர் நற்பேறு பெற்றோர்; அவர்கள் எந்நாளும் உம்மைப் புகழ்ந்து கொண்டேயிருப்பார்கள்.

உம்மிடருந்து வலிமை பெற்ற மானிடர் பேறு பெற்றோர்; அவர்களது உள்ளம் சீயோனுக்குச் செல்லும் நெடுஞ்சாலைகளை நோக்கியே உள்ளது.

(திருப்பாடல்கள் 84:1-5)

ஜெபிப்போமாக:

விண்ணுலகில் வாழும், எல்லாம் வல்ல தந்தையாகிய கடவுளே! இதோ இந்த இனிய காலைப் பொழுதினிலே, உம்மை போற்றி புகழுகின்றோம், வாழ்த்தி வணங்குகிறோம்.

உமது மேன்மையான படைப்புகள் அனைத்தையும், உமது வார்த்தையால் உருவாக்கினீர். ஆனால், மனிதனை உம் விருப்பப்படி உமது சாயலில் உருவாக்கினீர். ஆகவே, உமது திருமகனின் விலைமதிக்க முடியாத இரத்தத்தால், எங்களை மீட்க திருவுளம் கொண்டு அவரை பலியாக்கினீர். நன்றி அப்பா! நன்றி ஆண்டவரே! நன்றி தேவனே!

அப்பா! உம்மிடமிருந்து எங்களை பிரிப்பதற்காக, சாத்தான் கர்ஜிக்கும் சிங்கம் போல அலைந்து திரிந்து கொண்டிருக்கிறான். அவனிடமிருந்து எங்களை விலக்கி காத்தருளும். சாத்தானின் சோதனைகள் மூலம், பல்வேறு துன்பங்களை அனுபவிக்கும் அனைவரையும் மீட்டருளும் அப்பா.

இவ்விதம், நாங்கள் எந்த சூழ்நிலையிலும், சாத்தானுக்கும், பாவத்திற்கும் அடிமை ஆகாதபடி வாழ்வோமாக! இவ்வாறு ஆண்டவரே, உமக்கு சாட்சியான பிள்ளைகளாக, எப்போதுமே வாழும் வரத்தை எங்களுக்கு தந்தருளும்.